HL.RAMDINTHARA Mumbai leh Jabalpur-ah biak-in beih a ni
Mumbai, Maharashtra leh Jabalpur, Madhya Pradesh-ah Kristian-te biak-in beih a ni leh.
Kar kalta Zirtawpni zan khan Jabalpur-a Mandla District-a Bible convention neihna biak-in chu Hindu pawl member nia hriatten an bei. Biak-in beih a nih lai hian convention hmangin mi 200 vel an awm nia sawi a ni.
Kohhran hotute chuan Hindu Dharma Sena member-te chu biak-in ah hian kalin, buaina an siam a, biak-in compound chhunga pangpar khawina te an tichhiatsak tih an sawi. Hetihlai hian Sena member-te chuan Bible convention tih hming chhalin tribal mite chu Kristian-ah inleh tir an nih avangin an kal niin an sawi thung.
Biak-in beitute chunga action la ngei tura phutin, Kristian-te chuan pawikhawihtute man an nih loh chuan vawiinah Jabalpur-a Kristian school leh college-te khar vekah an vau.
Inrinnni zing khan Mumbai bul, New Panval area-a St. George Catholic Church chu beih a ni bawk. Former Minorities Commission Chairman Abraham Mathai chuan, 'Zing dar 1.30 velah mi pathum hmaituam, bike-a chuangte chuan biak-in hi lungin an tawng a ni. Police-te chuan thubuai an ziak lut tawh a ni' a ti. Lunga-a an vawmna avang hian Saint George lim dahna darthlalang pawn lam a chhia a ni.